يا شيوخ الوهابية…. تعالوا نتحاسب
31 December 2007اولا وقبل ما تشتمونى انا لا اسخر من علماء المسلمين ولا من العلم الشرعى
بس هذا الصنف من الشيوخ بشر زينا زيه ولا قداسة فى الاسلام فتعالوا نحاسبهم
1- كل واحد منك يقول انه بيدعوا طب بتدعوا المسلمين يكونوا مسلمين !!! ازاى؟
2- الواحد منكم يفضل يحسسننا انه بيكلم كفار قريش وعتاة الكفار كمان طب محدش فكر يكلم الاخوة السعوديين وحكامهم على فلوسهم اللى بتتصرف على المغنيات والراقصات ليه؟
ليه ماشفتش حلقة واحدة ليكوا تهاجم اسراف حكام دول الخليج وخاصة الاسرة السعودية وكفاية كلمة رئيس الوزراء اللبنانى اثناء الحرب الاخيرة ” 50 مليون دولار اللى اتبرعت بيهم السعودية بيصرفها اصغر امير فى كازينوهات باريس فى ليلة واحدة ”
3- لما نعمل زى ما انتوا عاوزين تفرضوا علينا السنن مع الفرائض وهى لازززم زى ما بيصرخ محمد حسين يعقوب مين اللى حيعمل عمارة الارض؟
4- لما المجتمع مجتمع فاسد امال محدش فيكوا صرخ ليه فى وجه مجتمعات الخليج اللى بتتشكى الهيئات الحكومية من زيادة ظواهر الشذوذ الجنسى وخاصة بين النساء وهتك عرض الاطفال
5- لما احنا مجتمع ظلمة محدش ليه بيقول للسعوديين المثل الاعلى بتاعكوا بتعدو الجسر للبحرين بتعملوا ايه كل اجازة
6- محدش فيكوا قال ليه يا حكام العرب ويا اغنياء الخليج ازاى تبقوا انتوا المورد الرئيسى لسياحة الجنس فى جنوب شرق اسيا (وعلى فكرة هناك فى بيوت الدعارة بيسألوا لما يعرفوا انك عربى عاوز صبى ولا ست؟)
7- اسألوا نفسكم ايه اللى معيشكوا فى مصر وهى بلد صعب اوى كده والواحد منكم متجوز بدل الواحدة اربعة واسأل برضه محمد حسين يعقوب هو ده رمز الزهد لما تبقى متجوز اربعة وواخد دور بحاله فى المهندسين ولا علشان الانشطة الدينية معفية من الضرائب
8 - لما مافيش قومية ومافيش داعى للوحدة العربية ومفيش داعى لوجود دول من اساسه ماحدش فيكوا قال يادول الخليج نظام الكفيل واللى بيتعمل فيه حرام حرام بجملة الحرام اللى حرمتوه علينا طول اليوم وسودتوا بيه العيشة
9- ما بتقولوش ليه للسعودية حماة الدين ان قوانين الزواج فيها غير شرعية لما الدستور المصرى مش عاجبكوا ( يحرم القانون زواج المرأة السعودية من غير السعوديين) ما بتقولوش ليه ان ده قانون جاهلى
10- لما انتوا كلامكم لازم يتسمع ما بتقولوش للناس ليه كلام العلماء الثانيين وقصرتوا العلم على ابن حنبل وابن عبد الوهاب وابن تيمية وابن القيم وعليكوا طبعا
11- ليه عاوزين تلغوا المذاهب الثانية متانسين ان مذهب ابو حنيفة والشافعى هما اللى نشرو الاسلام فى جنوب شرق اسيا (اندونيسيا والهند وباكستان وماليزيا….الخ)
ولا مؤاخذة